أمل فلا

- اصطبحنا واصبح الملك لله

- مالك يا أبلة شكوى ؟ ايه اللى مضايقك على الصبح ؟

- المواصلات كالعادة يا أبلة متهنية ( وكيلة ) ... المترو زحمة ...الميكروباص زحمة ... حتى الرصيف زحمة ...ايه الخنقة اللى احنا فيها دى ؟

- ياستى ما انا قولت لك تركبى معايا الصبح عربية الشغل بتاعة محروس جوزى ونعدى عليكى ناخدك فى سكتنا وانتى اللى مرضيتيش

- يا ابلة متهنية ما أنا قولت لك أنا ماأقدرش أنزل من البيت بدرى قوى كده قبل ما افطر اخواتى وألبسهم للمدرسة ..ماأنتى عارفة ماما الله يرحمها سبيتهم لى وهم صغيرين

- يا ستى بكرة ربنا يعدلهالك ويرزقك بابن الحلال

- ايه..؟ بتقولى ايه..؟ هو فيه ولاد حلال دلوقتى ؟ يا ابلة متهنية أحب أقول لحضرتك ولاد الحلال كانوا زمان اللى أنتم اتجوزتوهم وشوفتو معاهم أحلى الأيام ... انما دلوقتى ابن الحلال هياخد مدرسة تربية فنية زيى يهبب بيها ايه ؟ دلوقتى ابن الحلال عايز مدرسة انجليزى ... رياضة ... فرنساوى ... يعنى أى مادة من المواد الأساسية الحلوة دى

- ليه هو هيتجوز ولا هيختار مادة نجاح ورسوب ...!!؟

- لأ ... أكتر.. هيختار المادة الفعالة لفتح بيته ... الشغالة على الدروس الخصوصية طبعا ...انما أنا اللى زيى ممكن تتجوز على ضرة من المدرسات الفعالة اللى قولتهملك دول علشان يحطها الباشا ديكور فى الصالون ...يعنى... يستفيد منى بحاجة مفيدة

- ياساتر عليكى انتى سودتيها كده ليه ؟ يا شيخة تفاءلى خير ان شاء الله ...وبكرة الاحوال تتعدل باذن الله ... قولى يارب

- ياااااااااارب ...طيب يا أبلة متهنية أسيبك بقه وأدخل أصبح على ابلة فتكات ( مديرة المدرسة ) كل سنة دراسية وانتى طيبة

تذهب أبلة شكوى مسرعة لالقاء تحية الصباح على ابلة فتكات وهى تحاول أن تستعيد نشاطها اليومى وتلقى بالتحية الرقيقة على كل من تقابله من زميلاتها

- السلام عليكم يا ابلة فتكات

- وعليكم السلام يا أبلة شكوى ... تعالى يا أبلة شكوى عايزاكى فى موضوع مهم
تدخل أبلة شكوى الى حجرة المديرة وقد بدا عليها القلق وظلت تستعيد فى ذاكرتها خلال هذه الدقائق أى تصرف يكون قد بدر منها ضايق ابلة فتكات ..فالامر غير مريح خاصة وأن وجه الابلة فتكات لاينم عن الرضا فيما سوف تبادر به لأبلة شكوى ..ثم تبادر أبلة شكوى بالسؤال

- خير يا ابلة فتكات

- وصلتنى شكوى من زميلتك أبلة حقنة بانك واخدة حجرة التربية الفنية لحسابك وكل شوية بيجيلك طالبات ويقعدوا عندك ويزوغوا من حصصهم وبتضيعى وقتهم فى كلام فاضى

- أولا يا ابلة فتكات أى طالبة بتيجى عندى بتكون عندها يا اما حصة احتياطى أو حصة العاب - لان أبلة همدانة ( معلمة ألعاب) على طول تعبانة ومش بتشغل البنات- وبيكونوا مستاذنين من الحصة والبنات بيحبونى وبيحبوا يشتغلوا معايا فى النشاط الفنى وأنا بحاول أحسن ايديهم فى الرسم علشان زى ما حضرتك عارفة انه بيتضاف على المجموع ولازم البنات دى ترسم كويس علشان تاخد أكبر مجموع فى الرسم ثانيا أبلة حقنة أنا عارفة هى بتعمل كده ليه...... مش علشان هى مدرستى الاولى تتحكم فى وفى الطالبات وعايزاهم يدخلوا عندها بالعافية مجموعة تربية فنية بالرغم من أن أغلب الطالبات دى غلابة ومن أسر بسيطة

- اسمعى يا ابلة شكوى خاللى علاقتك كويسة مع أبلة حقنة ... هى بتقول انك دايما بتردى عليها وبتعدلى على شغلها قدام الطالبات.... وكده مايصحش

- أنا !؟؟.... والله ده هى اللى بتحاول تبيننى قدام الطالبات انى مابفهمش فى الذوق والالوان.... وكتير من الطالبات بيشتكى منها لأنها بتقعدهم طول الحصة من غير شغل لغاية لما تخلص رغى مع أبلة زهقانة وهمدانة ومحبطة

- خلاص يا أبلة شكوى ... أنا مش عايزة يجيلى شكوى منك تانى ... مفهوم ...؟
- هه ... مش هقول غير... لله الأمر من قبل ومن بعد